Wanawake wa mkoa wa Katavi waaswa kuongeza juhudi za kujikwamua ki elimu na kiuchumi

Posted on: March 8th, 2018

Hayo yamebainishwa na  Mkuu wa Mkoa wa Katavi Meja Jenerali mstaafu Rafael Muhuga  ambaye ni mgeni rasmi katika maadhimisho hayo.

 Maadhimisho ya siku ya Wanawake duniani katika mkoa wa Katavi yamefanyika Wilaya ya Tanganyika katika Halmashauri ya Wilaya ya Mpanda, kata ya Sibwesa.

Katika sherehe hizo mkuu wa Mkoa amewashukuru wanawake kwa umoja walionao kwa kuunda vikundi mbalimbali vya kijasiliamali ikiwa ni sehemu ya kutekeleza dira ya nchi ya uchumi wa viwanda kwa kuanzisha viwanda vidogo vidogo. Kauli mbiu katika maadhimisho hayo ni.. Kuelekea uchumi wa viwanda, tuimarishe usawa wa jinsia na uwezeshaji wanawake vijijini. 

Mgeni rasmi amewataka wanawake kuongeza juhudi za kujikwamua kwani katika mkoa wa Katavi takwimu zinaonesha asilimia 33 ya wanawake hawajui kusoma na kuandika . Alieleza kuwa takwimu hizo sio nzuri kisha akaitaka jamii nzima ichukue hatua za haraka kwa kuacha mila potofu, kuwakatisha watoto masomo na kuozesha watoto wadogo kwani ndio chanzo kikubwa cha tatizo hilo.